الأربعاء، 29 ديسمبر، 2010

مُقتَطفه 31 ~

سافِر عسَى درب السّلامَه يرافقْكْ ..... سافر وانا بَذْكرك ياصاح بالخير

عَطْني " أمانه " قبْلِ مَـ تْروح : خافِقْك ..... وانَـا بَحطّه في عيُوني وَابَـاطير
...
لا تأتِمِن قَلبِك مَعَ اللي ينَـافقْك ...... خلّه معَ اللي يعشِقِك , دُون تفكير !

الاثنين، 27 ديسمبر، 2010

مُقتَطفه 30 ~

بَاغيب عنّك مو عَلَى شان مَـ بْغاك ..... لكن غيَابي " غايَه بْنَفْس يعقوب " !

مُو شَرط لا جيت ابتعد يعني " انساك " ...... يمكن عشان الشّوق يكبر فـِ لِقْلوب !!

مُقتَطفه 29 ~

ياللّي غيَـابك : " مَغْص , وآلامْ وصْداع " ...... ياللّي وُجودك دوم قربي : " بَنَـادول "

سبَّبْ رحيلك يا الغَلا بعضَ الاوجاع ...... لا قوةٍ لي في رحيلك وَلا حول

الخميس، 23 ديسمبر، 2010

مُقتَطفه 28 ~

أصعَب علاقَة حُب لا صار قلبك .... يَنبض عشَان انسان فـ الحُبّ ناسيك !

مُقتَطفه 27 ~

بريّح اعصَابي مَعِك واقلِب الجَوّ ...... وآخِذ مِن اجواء القصَايد اجَازَه

ترَى نسيت الشعْر ياصاح للتوّ ...... مات الشعر واضحَى بِقربك جنَازه

مُقتَطفه 26 ~


منْ كثْر شُوقي قَطَّع الشُّوق الاوراق ..... والحين تبغاني أقدّر ظرُوفك ؟ ! ؟

يعني تلُوم القَلْب لا صَار يشتَاق ؟ ...... وتْلومني لا صرت أبغَى أشُوفك ؟

مُقتَطفه 25 ~

بِ مُنَـاسَبَة مُشاركَتي في مُسابقة رابطَة الشعر النبطي :

مابَه أمَل بالفوز مادامْ الاصوات ..... تتْميّز بْظلْم البشَر والتحيّز

الحكْم ظالم , رفَّع ذْلال الابيات .... وْحبّط عزوم ابيات بـاْرض التمَيّز

مُقتَطفه 24~


ليتْ المطَالب نيلَـها بالتمَـنّي ..... كان آتمنّى شوفتك قبْل مامُوت !


الثلاثاء، 7 ديسمبر، 2010

مُقتَطفه 23 ~

في مثْل هَذا اليومْ , عَمّي توَفّى .... وفْراقنَـا أكبَر حَدَث زاد هَمّي

كفّيت فـ التّعذيب والجَرْح وَفّى .... في دسّ جُرعَات الألَـم عّبْر فمّي

تَدري وش اللي شَمعَة الحبّ طفّى ؟ .... جَرحك ,! تَرى ماهو بْسبب موتْ عَمّي

من يوم طيفك عَن هَنَـا الرّوح قفّى .... ماعاد يغريني الهَنا بين غمّي

رغْم انّ حزني عَن عيوني تخَفّى .... الّا اْنّه بْقسوَه سكَن وسْط دمّي !

طحْت وْوجود الهَمّ بالقُرْب كَفّى .... مابَه سوى همّي عَليَّـه يسمّي

الجمعة، 3 ديسمبر، 2010

مُقتَطفه 22 ~

أحزان تسكنّي , مَهي أيّة احزان .... باسْباب بعض النّاس يوم اهْملُوني

يَعني عشاني شاعره , ماني انسان ؟ ..... ماحسّ لحظَه بالوَجَع لَو نسُوني ؟

بالعكس لي زهرَه وْمن كلّ بستان .... في ساحة الإحساس لو تَجهلوني !

وآحس لَحظَه بالفرَح واشعر احيان .... بالحزْن واحياناً أطير بْجنوني

والحين أبكي شوق , لهفه وحرمان .... مع خوف يسكن في مدامع عيوني

الأربعاء، 1 ديسمبر، 2010

مُقتَطفه 21 ~

الشّعْر صَابَـه في زمَنّـا تَشَبُّع .... كِلْ منْ كتَبْ لَه بيت صَار ابْه شاعر



يتْخَلّلَه كِذْب وْنفـاقْ وْتَصَنُّع .... خالي من الإحسَاسْ واسْمَى المشاعر



ماتَشعر فْـ جَوّ الشّعِر بالتّمَتُّع .... الاّ إذا كَان الشّعر بوح نادر



يتْمَيّز بْتنزيه نبضَه وْتَرَفُّع .... معنَاه عَن تَقصير عَن قَصْد صادر



لانّ الشّعِر اخلاق ماهُو تَقَنُّع .... واحساس نابع من عَظيم التفاكِر



بس الشّعِر يا للأسَف في تزَعزُع .... ماهُو بهالفَترَه عَلى مَنْت خابر