الخميس، 16 يونيو، 2011

نوم العسل !

قمْت وْياليت انّي بِهاليوم ماقمْت
وَلا يجي شيٍ يعكَر صبـاحي

البارحَه ياريم مَع ضيقتي نمْت
وامْسَت جروحي وَقْت بردي وشاحي

غمّضْت عيني بَعدما فيه قد همْت
عانَقْت طيفَه من جميعَ النّواحي

ضنّيتني في بَحْر نوم العسَل عمْت
وآثرَ الدّمُوع وْقاد والجرح صاحي

لمْتَه وَلكن ليت ياريم مالمْت
كنّي جَلَبْت الهمَ والحزْن ناحي !!

طرْت بْسماه وعن جموع البشَر صِمْت
وْطحْت وْهواه اللي كسَر لي جِناحي

واصبَحْت والاّ بيني وْبينه الصَّمْت
صوت الوجَع شَوَّش لِـ عالي صياحي

حسّيت انّي في حناياه لو دمْت
عجَّل عليّ مْن الحنايا رَواحي

الأربعاء، 4 مايو، 2011

مٌقتطفه ४७ ~


بعض البشَر فَرقاه أقسى من المُوت
وبعض البشر لا راح ماهَمّك بْشيّ

تحْسبني انْ رحت وتخلّيت باموت ؟
فرقاك عندي مثْلما شربة الميّ

مافات ياغدّار منْ عمري الفُوت
بطويك مع طيَّ الألم والحزِن طيّ

بَحْسِبْك ميّت لاَ وَلا ينفع الصوت !
عمرك سمعت بْميّت ابقى من الحيّ ؟!

الثلاثاء، 3 مايو، 2011

مُقتَطَفه ४६ ~

ياللّي غيَـابك : " مَغْص , وآلامْ وصْداع " ...... ياللّي وُجودك دوم قربي : " بَنَـادول "

سبَّبْ رحيلك يا الغَلا بعضَ الاوجاع ...... لا قوةٍ لي في رحيلك وَلا حول
...
الجَرح يامر , والغَريب انْه ينطاع ! ..... كنّه على صدْر الهوى سيف مسلول

مثْل " البَعَض " لا جاك , يَلبَس لك قْناع ..... يمْطرْك طيبَه والحَكَي منْه معسول

يَرفَـعْك فوق وْثمْ يساويك بالقاع ..... مالَـه سوَى " الطّعنات " رغبات ومْيُول

وانت بْغيابك تمْتلك ذاتَ الاطباع ..... كنّك تنافقْني على حَسْبْ ماتْقول !!

يومك تقول ان الغلا صَعْب ينباع ...... واليُوم بعت ومَنْت فـ الحب مسؤول

ماللغَدِر في داخل القلب مرقاع .... والجَرح : شدّه , يا عَنا القلْب , وتْزول

السبت، 30 أبريل، 2011

مُقتَطفه ४५ ~


تَرايْ اتصَنّع الضّحكَه واخَـبّي خلفَها آهات ... وْمابي عْدايْ تتشمّت بِـ قَلبي يوم فارقْـتَه

ويوم النّاس تسألني عن اخباري , فِـ بِضْع ابيات ... ترى أقنعتُهم إنّي قبل لحظات عانقْـتَه

وانا والله خلّيـتَه وفارقْـتَه قبل لحظات ... وحسّيت الصّدر ضايق , يا غالي ليه ضايقْته ؟

تعبْت اكذب على العالم تعبْت اتْصنّع الضحْكات ... هجَرني وانْطفَى ضوّي,خساره يوم رافقْته

تعوّدْت وْخذا قلبي على الهمّ وْبعَضْ مرّات ... يسابقْني الحزن لكن كثير ايّام سابقْته



الجمعة، 29 أبريل، 2011

مُقتَطفَه ४४ ~

خَلّ الفَرح لاْهْـلَه ولاَ تْقُول : ضِحْكٍي ..... ماضْحَك وانا في داخلي ألْف دمعَه

شفْني فـِ بُعدك أذرف الدّمْع وابْكي ...... وْمحْدٍ يواسيني سوَى نُـور شَمعَه

مُقتَطَفه ४२ ~

إجرَح وهين وْذلّ واقسَى عليّه ....... ماغير تعطيني عَزيمه وقوّه

لا تَحسب انّ النّاس عندك سويّه ....... بعض العَرب تَجرَحْه , يزداد ضوّه
...
انا كذا من بَعْد جرحك , قويّه ....... بس الخفُوق بْفعْل جرحك تشَوّه

ليه المدامع في غيابك جريّه ؟ ...... ياعين كفّي مالك بْضيق جوّه

باعيش بَعدك بس " مالي هويّه "...... وانت الذي تبغاه ياجرح سَوّه

مثقتَطَفه ४१ ~

اليُوم جمعَه والأوادم تصلّي ..... وانا صلاتي خوف ودْمُوع واحزان

ياشين لحظَات الجفا والتخلّي ..... لاجات من إنسان , مو أية انسان !

كنّه فـِ وَضْح الصّبْح لاصْبَحت : ظلّي ..... وكنّه فـ عزّ الليل للخوف : نسيان

مايعترف باللَعْب ويّـا التسلّي ..... لا حَبّ حَبّ بْصدْق واحساس " واحسان "

واليوم في غيبَتْه دمعي يهلّي ...... ماعاد لي بَعدَه فـ هالوقْت خلّان

باكَفكف الدّمْع وْعساي وْلعَـلّـي ..... اعتاد بُعده واقسم الرّوح " نصفان "

قسمٍ ينادي للأمل والتحلّي ..... بالصّبْر , والآخر يجي مَعْه قرآن

يقرا كلام الله وثمٍ يصلّي ..... على النّبي , لا خوف لادمْع لا اْحزان

الجمعة، 25 مارس، 2011

مُقتطفَه ४० ~


هلّت بشَـاير عزّتي وانتصآري ..... دامك رحَلْت , وأوّل الغيث قَطره !

ماكَان حبّي والهَوى باختيَـاري ..... كان الغلا في داخل القلب فطره

قَلبي تَرى ماجاب للحبّ طاري ..... الاّ بَعد ماشمّ فِـ الرّوح عطرَه

لكن ذبَـل عطرَه , وغيّر مسَـاري ..... واعرضْت عَن وجه الهوَى وْجيت سَطره

وْكتبْت بَـه بيتٍ من الحبّ عَاري ......لكن بدون احساس ضيّعت شطره