الثلاثاء، 17 نوفمبر، 2009

بلاش النصح


بلاش النصح يا الواعض بلاش الوعض والإرشاد
انا فاهم حقيقتهم ولكن ساكت لْـ غايه ..

الاول طاح من عيني .. عليه زْناد ماهيْ زْناد
يفاخر بالجسد يمّي وعآجز يرفع الرّايه

وثاني القوم يتْظاهر بكثر المال والأولاد
بَعد ما طاح في يدّي أشوف انقَلْبَت الآيَه!

عشيرة تدّعي: سيرة وأخلاق وشرف وامجاد
واشوف انْهم خَذَوا ظلمي وظلم العالم هْوايه

يا أسياد الطمع يكفي جشع واطماع يا أسياد
حسافه صارت الدوله فـ عين العالم حْكايه

ياليت انّ الزمن يمحي تواريخ العَرب الاوغاد
ياليت انّ الدّوَل تختم بموت الحرب لِرْوايَه!

الجمعة، 13 نوفمبر، 2009

خذ الحكمه من شْفاهي !

مَـ ردّك تنصدم فيني وتعرف وش أصِل أصْلي
انا صاحي ولَكنّي أمثّل فـ البشر ساهي

إذا فكّرت تتلاعب بحقّ النّاس من أجلي
فَـ ردّ الحق لِـ صْحَابه وضَحّي من أجِل جاهي

بما إنّك عرفت انّي أحامي عن بقى أهْلي
تأكّد ماني بْراضي أصير الغافل اللّاهي

فَـ يااللّي تدّعي "عاقل" وطحت بيَدّ من مثلي
لو انّي ماني بْعاقل .. "خذ الحكمه من شْفاهي"

حرامي ناهب وسارق وتطلب في الهوى عدلي؟
تقارن عدلي بْظلمك وتدري ظلمك يْضاهي ؟

على راسي تحاكمني ولكن ينقطع نسلي
لو إنّي أنحني طوعك ..يا ظالم مابقَى اللّا هي!

قبلنا لو تشاركنا في نصّ المال .. بس تجلي
هموم الشعب وتبطّل تصير الآمر النّاهي !

الخميس، 12 نوفمبر، 2009

ظلـــم !

يا شين جوّ البارحه يوم صاحت
ذيك النّسا .. يومك تصدّد سؤالي

الاّ وربّك بعدما النـّاس راحـت
وش آخرة ظلمك يا شين الفعالي؟

ظالم وجاير والبشر منْك ناحت
ناهيك عن قسوة ضميرك وتالي

دام النّسا من عين هالنّاس طاحت
ما طاح قدرك من عيون الرّجالي؟؟

ما لاح برقك يوم لِبْروق لاحت ..
ماشاع صيتك فوق صدر المعالي

سيرة حياتك مثلما الريح فاحت
حسن السلوك ألغَاه شيٍ جرالي

قاسيت غدرك والجروح استباحت
مثلك بشر ما يوم مثلك طرالي

يدّك عن الحسنا والافضال شاحت
يقطع يمينك يا شحيح الرّيالي ..

مامْدَى همومي عن مدَى الدرب زاحت
الاّ وهمومي عادَت بْراس عالي

لازمت صمتي لين الايّام باحَت
باح النّهار افعال تالي اللّيالي

فرصّة حياتي بعد هالعمر تاحت
يكفي فضحتك يوم ما عدْت غالي