الأحد، 8 أغسطس 2010

مًقتطفه ~ 8

آسف تراني من عَنَا الوقت مخنوق
ماشفْت من شان اعتذر لك طريقه

ساعه يخون النّوم واحيان في السّوق
والصّدق انّي ضايقٍ والحقيقه

انّي رَحَلت وْكنت بالوقت مشنوق
واسباب بُعدي حيره او قول ضيقه !

مًقتطفه ~ 8

أنَـا من اسباب الحزن صدق مخنوق ..
لاني عَلى خبرك ولا نيب رايق

لو تَدري انّي من ورا الهَم مشنُوق
والجرح من يومي بالاحزان فايق

الله يعين القلب من جد مَعيوق
من يوم يومه بالجروح امتضايق

مًقتطفه ~ 7

لا قلت ابي شَوفَه ولو في مَنامي
صحّاني الواقع عَلى حلْم كابوس

ودّي اشوفه صدْق واقف أمامي
ودّي أحس بْشي صدْقي ومَلمُوس

ولّا الصّوَر وش فايدَتْها ودامي
طَلَبْت انا شُوفك ابي شي محسوس

يامَكْثَر صْوَرّك على "فلاش" ضامي
ودّه بِحالي شَهْد في فَمْك مدسوس

مًقتطفه ~ 6

تَوّي صغيرة سن ياخوي وش فيك ؟
ليه آتِزوّج واحمل هْموم غيري ؟

عَطْهم من الآخر وانا الحين بَعطيك
آخر كلامي قبْل ينفَى مصيري

مابيه لا والله ولوّ انت مابيك
عفْت الزواج وطار فـ الحب طيري

مًقتطفه ~ 5

ياللي مِسَوّي لي عَلى صفحتي : تَاق
مليًون مرّه قلت لك لا تسَوّي

مَاني عَلَى هَرج المحبّين تَوّاق
حتّى الخواطر صَارت تْعيق جوّي

الحب مو بَلوَى تَرَى الحب حرّاق
وانا فسَخْت العَقْد واصبَح عَدوّي

ماراح اقول : ارجَع أنا اليوم مشتاق
باقول لـِ شْموع الغلا لا تضَوّي

مَقْدَر عَلى العشْق وْلواهيب الاشواق
من ساعة الفَرقَى وْقَلبي امتلَوّي

مًقتطفه ~ 4

مَسَاءك عمري وروحي وقلبي مَع أحاسيسي
مساءك عطْري العَاشق لـ ريحَة ثوبك المجنون

مسَاءك فوق عاداتي .. تعَدّى بك مقاييسي
مسَاءك فاق نوبات الجنون وْصار بك مفتون

ياريح الوَرد ببعَث لك معَ النّسمه جواسيسي
عيوني وخافقي تسأل .. عن اغلى ناسي المَزيون

مًقتطفه ~ 3

أحتآجني .. ! جنبك وحولك وقربك
وأشتاق لي ..! لحظة عِنَاقك ومَلقَاك

..

مًقتطفه ~ 2

ياللي تقُول انّ الحزن ماله عْلاج
الحل فـ القُرآن وآيَـات ربّي

صَدّيت خلق الله مَع انواع الازعاج
وْهَدّيت باسم الله وْطَمّنْت قلبي

مُقتطَفَه ~ 1

كِنّ الشّوارع والبيُوت القَديمه
والورد الاحمَر والرّسايل والاشعَار

صارت من اسبَاب المواجع سقيمَه
وْكسَى ملامحْهَـا تجاعيد وغْبَـار

حَتّى طمُوحاتي غدَت دُون قيمَه
رغْم انّْ أسْهَلهَا على الروح تذكَـار

ابَرتكب في الرّوح أكبَـر جريمَه
وآخونَها مَع موت شعري والافكار

صحيح إنّي بالمشَاعر كريمَه
صحيح إنّي للشعر صرت الامطار

لكنّ من زود الألَـم صرت غيمَه
غَطّت على صفحة بحاري والانهار