الخميس، 21 مايو، 2009

عيـــــونه


عيونه زارت عيوني وصحّتني من احلامي
وانا ماغير بس ابحث عن الأقلام والأوراق
*
*
يا عين القلب لو تدري بدونك ضاعت اقلامي
والى منّي نويت اكتب تعذّر قلبي المشتاق
*
*
عيونك أصبحَت عاده وطول اليوم قدّامي
انام وينتهي يومي واقوم بلهفة الاشواق ..
*
*
على صورة عيون اللّي عيونه جابت اعدامي
اناظرها وانا أدري عيونك والهوى الحرّاق
*
*
وذاك الرمش والحاجب وكلّك أجبَر إلهامي
وجيت انثر شذى عطري لعلّه يرضي الاذواق
*
*
اقول فـ مطلع ابياتي لو انّي (فيصل اليامي)
كتبت ابيات لعيونك وقلت الحب ما ينطاق
*
*
بدون اسمك ولا قلبك .. بدونك والبحر ضامي
بدون عيونك الخجلة بدون الحب ما أشتاق !
*
*
فديت عيونك الحلوة .. تموّت قلبي الدامي ..
من النظرة الى منك لمحته قلبي التوّاق ..!

الأربعاء، 20 مايو، 2009

يآ عدو شبه الجزيرة

جشع .. جشع ..

من متى والحال يتميّز بالوجع ..؟

وحدّ علمي بالمَلِك .. ما يقيّدْه الطّمَع ..!

حاكم يشوف الظّلم .. كمآ شربة المآي ..

وحاكم يشوف النور .. مثلما حلم وظلآم ..!

يابو تركي .. بعد إذنك .. ناولني النآي ,

بعزف لحن حب [ الحرام ]

والسرقة .. والظلم بعد الإنقســـآم ..

أظن الشعب بأفضال ظلمك .. على ما يرآم :)

والحب .. والأمن وطيوف الســـلآم ..

مثل الوجع ..

لا جا من اصحآب الطمع ..!


منذُ آلاف السنين ..

تنهب وتسرق .. وتسرق ..

تسمع آهات وأنين ..

لكن على قلبك طبَع ..

بعض ظلم .. وبعض آخر من جشَع ..!!!

وانت تسرق .. وتسرق ..

وكلّما قلنا بتشرق ..

ماتت احلام واحلام ..

وانتشر حب الحرام ..


ألا تفقه .. ألا تفقه ..؟؟؟؟

مابعد قلبك خشَع ..؟؟

آآآه يا مَقسى الجشَع ..!

أستاذنك ..

يا ( الحرامي )

واعتذر على قولة ( حرامي )

لا صار حكمك عليّ محتوم ..

استاذنك بذبحك ..

وبسمح لقلبي يجرحك ..

يابو تركي ..

عطني بعد إذنك فرصه أخيره ..

أنتقم للشعب .. وارضي ضميره ..

واسحب اموال ظلمك يا عدو شبه الجزيره ..!


ياترى قلبك شبَع ..؟؟

ولاّ بقى بعض الطّمع ..؟؟


يازود حبّك للفلوس ..

وش كثر طآرَت رؤوس ..

بعدما صار الفقر .. عادة آلاف النّفوس ..



من يسمع الشكوى ..؟

إذا الحامي حرامي ..؟

وانا قرّب اعدامي ..!!


خلّ الجشع ..

دام الجشع .. عادة الشعب الأبي ..

دام الطمع ..

قادر يحقق مطلبي ..!

دامت آخر احلامي ..

ما يحققها الا الطمع ..!!

الجمعة، 1 مايو، 2009

يآ طيــــر



يا طير انا من طيحتك طال ممشاي
أنطر علوّك بالسّــــما مع عُلُــــوّي


لا طحت منهو يفزع بْشربَة المآي
ياطير انا ضامي ولادري شَسَوّي


خيّرت خلّي بالوصل بعد فرقآي
واختار هجري وانطفى فيه ضوّي


اثر الحلوم اللّي تراود في عيناي
مثل السّراب اللي يحاول دنوّي


ابطيت اغنّي للألم واعزف النّاي
يا طير محدٍ فالهوى عآش جوّي !


أبكي وأشكي واعترف زادَت خطآي
اخطيت وادري يا شماتــة عــدوّي


وجهة نظر يومك تخالفني الرّاي
يا طير بدري ع السّفر قول توّي

اذكر سحابة صيف مرّت بدنيآي
حطّت عواقب في مراحل نموّي


مابين وصله والهجر شوف يمناي
اثره يميني مع يسآري امتلَوّي


شُلّت يديني بعدما كان طريآي
يروي عيون اللّي بعيني امتروّي