الأربعاء، 30 ديسمبر، 2009

الميــMــم



تدري فُؤادي يوم شَآفـك تعَمّـد
يقصد قصيدٍ ينتهي بَـس "بالميـم"


لانّك "مُحمّد" ببتدي في "مُحمّـد"
وآهيم في مبسم ثنَايـاك وآهيـم


يَاوَيحَ قَلبي .. ذاكَ جرحي تَضَمّـد
من بَعْد حبّك هَدّم الجـرح تَهديـم


قَلبي حريقٌ .. بعْـد حبّـك ترَمّـد
يالَيتَ شعري .. قلبك امطَار او غيم


أهوَاكَ يَامَن .. بكْ شعُوري تجَمّـد
وّذوّبْه حبّك ذوَبَه بـس "بالميـم"

الجمعة، 25 ديسمبر، 2009

مابه اصابع تختلف عن بعَضْها

ظنّيت بين النّاس والنّاس شتّان
دام الاصابع تختلف عن بعَضْها

بس الحقيقه كلّهم نفس الالوان
كتلة حقايق بس عقلي رفَضْها

دام الخديعه والكذب مثل الالحان
صارت تُغَنّى والبشر من فَرَضْها

حتى الضماير باتت بْدون عنوان
ليت الضماير ما نسَاها وَعَضْها !

أدري ضميري حيّ وان كآن منْهَآن
غير الحقيقَه يا زمَن ما لفَضْهَا

يا كيف اصدّق هالنّقايض والانسان ..
عَزّ النقايض .. والحقايق نقَضْها

الناس مَرضَى بالكذب والكذب بان
وسْط الجبين وْما تلَآشَى مَرَضْها
حسبي عليهم مابَه عْلاج مجّان
ينفض عقولٍ هالبشر ما نفَضْها

ساعات اقدّر فوق الانسان .. حيوان
لانْ البَهايم ما تشَآبَه غَرَضْها

مابَه كذب مابَه غدر مابَه احزان
مابه قلوبٍ تحترق من بغِضْها

بافضّ سيره عن غرابيل الازمان
اصلاً ضميري حَسّ فيني وْفَضْها

طال الزمن ولاّ قصَر مابَه انسان
قصدي أصابع تختلف عن بعَضْها

الجمعة، 11 ديسمبر، 2009

بعض البشر ميّت وهو فـ البشر حي


وش يروي الضامي سوى بارد المَيّ
وان ما رواه المَا وش اللي بيرويه ؟

لا جاك ضامي يرتجي غير هالشيّ ..
لابدّ طالب شيّ ثاني يداويـــه !

لا صار يشرب بس ما يكْفي الرّيّ
والشوق جاب الذكريات بْموانيه

وش ينفع العاشق اذا شعشع الضيّ
وامسَى بعيدٍ عن حبيبٍ يهنّيه !

دنيا غريبه تجمَع العَدْل بـ الغيّ
تجمع بني آدم مع اللّي يعاديه

لا عشت عمرك دون صاحب ولا خيّ
ماغير جرحك صار قلبك يخاويه

والهمّ عامل فـ الزمن شيّ وشويّ
ودّك لو انّه حَيّ من شان تفنيه !

همٍ كواني يافهد فـ الزمـن كَيّ
خبرك طواه اللّي وعدني بيطويه

صفحة همومي صفحةٍ مالها طَيّ
أحتاج "كلمة" .. أقصد أحتاج "تنبيه"

قلّي شسوّي يافهد واللحَم نيّ ..؟
حكْمه حلال ؟ او انتظر لين تقليه ؟

يكفي شوَتْني ألْسُن النّاس والشّيّ
قالوا لِمَنْ يجهَل بِصَقْرٍ يشَوّيه

الكل يجهَل قيمتي وْسيرتي زيّ
اعلام نصْرٍ فوق لِجْبال تعليه

بعض البشر ميّت وهو فـ البشر حَيَ
والبَعض الآخر حَيّ والغير يلغيه

حظّي لوَاني يا هَوَى فـ الزمن لَيّ
طاح وتخلّى عن بقايا مباديه !

لاجيت ابشعل للأمل شمعة الفي
كلما شعلته شمعة الياس تطفيه !

معروف حظّي مالَه امٍ ولا بَيّ
قضّى حياته في اليتم .. مع أعاديه !