يمــّــــــــــــــه !

ذبحني الشوق يا يمّه وصارت عينيَ اليسرى
تعاتب عيني اليمنى على فرقآك وغْيابك

بدونك والله يا أمّي .. جروحي ما هَقَى تبرى
تعالي حيل ضمّيني .. انا مشتآق لتْرآبك !

ذكرت ايّامك الحلوه .. وثارت فيني الذكرى !
ذكرت انّي قسيت اوّل .. وصكّيتي عليّ بابك

تضنّيني بغيت اقسى ؟ وإنتي يا هَوى أدرى
عن اللي يختلج صدري .. واظنّ الكون أدرى بك

يايمّه يوم لو رحتي .. وش اللّي فـ الزمن يجرى ؟
يصير الكون يترجّى .. يريد اليوم يهنى بك !

وانا من يوم قفّيتي .. تدور بْـ راسيَ الفكره ..
اقول شلون شلتيني .. ولآ كنت احسب حْسآبك !!

حملتيني تِسِعْةَ اشهر .. والين اليوم ولْـ بُكره ..
تضمّيني مثل طفلٍ تشبّث بآخر ثيآبك ..

حميتيني من الدنيآ وصآر الخوف ما يُطرى ..!
نسيت الخوف بوجودك .. ولكنْ عيني تْهابك !

تعلّمت انطق ْحروفك .. تعلّمت اكتب واقرا ..
وأوّل ما كتبت اسمك .. واظنّ الشوق من جابك

سمعتي الصّوت يندَه لك .؟. عرَفتي صاحب النبره؟
أنآ يمّه اقول اسمك.. دخيلك فكّي ابوابك

دخيلك فكّي ابوابك .. انا مشتآق من فَتره ..
يايمّه حيل ضمّيني .. انا مشتآق لـ تْرآبك !

شفآتــــــــه !

مساء بنكهة السّكر .. مساءٍ يشبه البلّور
عليك القي تحيّة حب .. تليق بوصفك الراقي

من اجمل ما خلق ربّي ..صفآتك كلّهآ من نور
حسبت النّور بحْضورك لهيبٍ ينوي احراقي !

من الأعلى إلى الأسفل .. بنيت مْن الجمآل قْصور
خذيت الزين والباقي ؟ وش الباقي وش الباقي ؟

مشآعر تحتوي قلبي .. تفزّ وتحترق وتْـثور !
وكنّي شايله بْقلبي .. مشآعر هزّت اشواقي

صحيح انّك بشر لكن جمآلك صآبني بشْعور
شعورٍ يشبه (الكلمه) اذا ضاعت من اوراقي !

وش اوصف بس وش احكي ؟ اقول اللؤلؤ المنثور ؟
وسط شفّه تقول انْهآ عسل مشتآق لعْنآقي !

شفايف كنّهآ سكّر .. وصآرت للجمال قْبور
وله سكسوكةٍ صآرت لـ ورد شْفآته السّآقي

يقول القلب خلّيني .. بدوّر غيره (المغرور)
حشا غيرك يا بو هاشم حشا والله مو لاقي!

لو انّي ما بغيت امدح .. ولكن بيّح المستور
غرامك وانجبر قلبي يرددهآ من اعمآقي :

عسل والله .. عسل والله.. شفآتك والشّعر معذور
لو انّه والله ثمْ والله.. كلام ينآقض اخلاقي !

صحيح ان (الحزن) لوني .. ولكنّ (الغزَل) مهذور
من احساسي الى منّك قدرت تْشبّع اذواقي

وازيدك في الشعر بيتٍ انآ لي من ثمآن شْهور
احآول اكتب ابياتٍ تليق بوصفك الراقي !