الجمعة، 11 ديسمبر، 2009

بعض البشر ميّت وهو فـ البشر حي


وش يروي الضامي سوى بارد المَيّ
وان ما رواه المَا وش اللي بيرويه ؟

لا جاك ضامي يرتجي غير هالشيّ ..
لابدّ طالب شيّ ثاني يداويـــه !

لا صار يشرب بس ما يكْفي الرّيّ
والشوق جاب الذكريات بْموانيه

وش ينفع العاشق اذا شعشع الضيّ
وامسَى بعيدٍ عن حبيبٍ يهنّيه !

دنيا غريبه تجمَع العَدْل بـ الغيّ
تجمع بني آدم مع اللّي يعاديه

لا عشت عمرك دون صاحب ولا خيّ
ماغير جرحك صار قلبك يخاويه

والهمّ عامل فـ الزمن شيّ وشويّ
ودّك لو انّه حَيّ من شان تفنيه !

همٍ كواني يافهد فـ الزمـن كَيّ
خبرك طواه اللّي وعدني بيطويه

صفحة همومي صفحةٍ مالها طَيّ
أحتاج "كلمة" .. أقصد أحتاج "تنبيه"

قلّي شسوّي يافهد واللحَم نيّ ..؟
حكْمه حلال ؟ او انتظر لين تقليه ؟

يكفي شوَتْني ألْسُن النّاس والشّيّ
قالوا لِمَنْ يجهَل بِصَقْرٍ يشَوّيه

الكل يجهَل قيمتي وْسيرتي زيّ
اعلام نصْرٍ فوق لِجْبال تعليه

بعض البشر ميّت وهو فـ البشر حَيَ
والبَعض الآخر حَيّ والغير يلغيه

حظّي لوَاني يا هَوَى فـ الزمن لَيّ
طاح وتخلّى عن بقايا مباديه !

لاجيت ابشعل للأمل شمعة الفي
كلما شعلته شمعة الياس تطفيه !

معروف حظّي مالَه امٍ ولا بَيّ
قضّى حياته في اليتم .. مع أعاديه !

هناك تعليق واحد:

  1. صح السانك ...
    بصراحه مره اعجبني بروفايلك واتمنى التواصل
    f_h_ilove@hotmail.com

    ردحذف