أرقام ؟ تدري بي فـَ لا اوزّع ارقام !

ياللي تدوّرني لك شْهور وايّام
انا نويت ارحل ومن دون رجعه !

وان كنت تطمع في ملاقاتي "الزام"
وان كنت طالب "للمظاليم" فَزعه ..

تلقاني بْـ حيّ "المظاليم" قدّام
يم شارع "الظهران" أصله وفرعه

يمكن تشوفه يسبق الشارع العام
ولاّ يقَع وسْط الجبل فوق رفعه !

عنوان بيتي ما توطّيه الاقدام ..
ومحْدٍ قدَر يستنتج فْـ وين وضعه !

وشلون توصل لي وهالنّاس نيّام ؟
يكفي كلام النّاس وشلون ردعه ؟

ارقام؟ تدري بي فَلَا اْوزّع ارقام
لكن بقوله وانت حاول في جمعه :

صفرين فتح الخط لو كنت فـ الشّام
وتسعه وسته مرتينٍ في دفعه

ثمْ الصفر والخمستين وبالاكوام
خمسات خمسه .. وبعْدَها صفْرْ سبعه

وابصم لك بْعشره لو تْدق اعوام ..
ماظن تلقاني لأَنْ تَم مَنعه !

وان كنت ناوي بَه لاجل وصل الارحام
نفس الرّقَم لكن نهايَتْه تسعه !

لكن تذكّر من فعَل ذنب ما نام
واللي تريده خالَف الدّين ..شرعه

الدين له أصْل وْمبادئ وأحكام
لا تحدث بْدينك في هاليوم بدعه

يومي نصحتك شفت مليون لوّام
وشلون انصح من تمسّك بطبعه ؟

ادري كلامي مايعَجْبك ومادام
قاسي كلامي لا تحاول في سَمعه

مير القصيد اللي بقوله و"باللّام "
يمسح من عْيونك ترى ألف دمعه

سْهام شعري صابت الحظ وسْهام
شطرٍ كتبته ما تعمّدت سجعه

لا طاح حظّي.. طاح ادري ولا قام
لكن بصلّي للرحيم الف ركعه

واطلب من الله يعدل الحظ من عام
واشعل واضوّي للأمل الف شمعه

آخر قصيدي مابغيت اكسب اقوام
تمدح قصيدي او تَضع فيه "سُمعه"

لكن نويت ابني من الشّعْر أحلام
والقى لحظّي بعد ما طاح "صنعه"

والحظ صاير ممتلي كذْب واوهام
ماعدت افرّق بين ضرّه ونفعه !