الثلاثاء، 20 أبريل، 2010

يَـــارَب !




يارب ياللي تعلم بْحال انسان
عايش حياته بين هم ومسرّه

انا قضيت العمْر في زحمة احزان
ماعدْت افرّق بين خيره وشرّه

يارب ساعدني على صدّ الاخوان
واللي رماني وسْط غدْر ومضَرّه

ياعالم بْحالي انا اليوم تعبان
واللي تعَبْني بالحياة المُغِرّه

انّي فعلت الذنب والقلب منهان
واليوم قلبي تايهٍ عن مقَرّه

شيطان زيّن لي ذنوبي وشيطان
دسّ السّموم بوسْط قلبي وغَرّه

غلطان ادري بعْد هالذّنب غلطان
والرّوح من ذنبي تَرَى مقْشَعَرّه

كنت بْغروري في هَوَى النّفس طمعان
والرّوح كانت بالزّمن مستغَرّه

خلّيت عنّي سيرة افلان وافلان ..
قلت الحياة بْدونهم مستمرّه

بس الحقيقه .. والحكي دون نقصان
ان الاوادم في غيابي تشَرّه !

و"الشّر" في وسْط الميادين فنّان
شفتَه كَما دنيا سعيده مُسِرّه

و"الخير" جازيته بـ غَدْر وْبنكْران
شفته كما دنيا تعيسَه مُضرّه

حالي مثل حال المظاليم حَيران
وْقلبي ولا بَه من هَنَا الوَقت ذَرّه

يارب انا طالب في هاليوم غفران
ودّي اعيش بْدنيةٍ مستقرّه ..

ياربي اغفر لي غرابيل الازمان
وآنا ولَو بستغفرِك ألف مرّه

ماظنّ تشفع لي .. ولكنّي الآن
نادِم وقلبي جرّه الهَمّ ..جرّه

باتُوب والله يغفر الذنب وان كان
عشت العمر باقيه .. حلْوَه ومُرّه !

ليست هناك تعليقات:

إرسال تعليق